2023-02-26
攞自己個名講笑講咗幾十年，謝禮嘛，呢一日終於到啦，當要鞠躬畀來賓，就會叫家屬個名阿謝禮，家屬謝禮，有心。
一去到靈堂披麻戴孝後，我對眼自自然然地追住周圍花牌上祭輓嘅文字。（老實講，到呢一刻我都成日講錯花牌定花藍。）見到有句「雁行折翼」，第一次見，見到即時好想喊，好具像，好有畫面呢。諗起當年送好朋友呀咩，「音容宛在」四字，一直喺我心底迴盪。
「雁行折翼」唔係for我用，我阿哥未死，我死老豆呢，而家平伏晒，我無事，最有事嘅係我窮到要賣身葬父咁滯，原來搞場嘢要咁貴。咁係物有所值嘅，又live band又有show，破地獄真係好精彩，個師傅圍住地下個火盆轉圈嘅同時又快速自轉，自轉嘅同時又揸住把着火嘅劍，好似轉出一個個火圈咁，轉呀轉，我即時諗起日本溜冰王子羽生結弦，好睇到我差啲喺靈堂度拍手掌呢。事後問返屋企人，原來當刻大家都想拍手。吹脹。
靈堂、上山、纓紅宴，雖然有好多好耐無見嘅親戚，但我一直無乜講嘢。我傷感到講唔到嘢咩，又唔係，或者靜靜地就係我抒發嘅方法。人人唔同嘅，好似家姐鍾意大爆狂喊，阿哥就同親戚朋友講嘢，阿媽就⋯⋯我唔記得咗，我無留意咁多嘢，而我就默不作聲黑起塊死人面，個樣十足死老豆咁。咁呢啲都係唔同性格嘅表現，MBTI，我INFP，就係向內尋找能量嘅。
唔同性格就有唔同抒發嘅門路，無對與錯，無好與壞，有時教小朋友，都會將對與錯兜口兜面加諸喺佢地身上，咁啱唔啱呢？無對與錯嘅，性格使然。😏
性格，天生嘅，我地由細到大不停被人提點唔啱嘅地方，或者呢幾千年幾萬年都係咁發展到今日。唔啱嘅地方，其實就係不足之處，在於性格成長而言，都係要趨向自己缺乏嘅方向嘅，內向嘅人學習多說話，外向嘅人嘗試收歛，所以，要挑剔一個人非常咁簡單，但可否嘗試欣賞呢？
你好，我係INFP，請欣賞我嘅優點。