2023-03-26
尋日收到生日禮物，叮噹時間布底褲。（叮噹又好，多啦A夢又好，時間布好，時光布都好，睇得明就好。）
好正嘅一份禮物，好明顯就係想時間布冚住嘅地方回到過去，逆齡回春啦！
42歲，其實真係感覺到老咗，底褲都由中碼改着大碼，仲有就係唔太捱到夜，兩三點就眼瞓，想當年呀⋯⋯算啦，人老咗就成日想當年，回憶梗係美好啦，難過痛過都行過咗，呢一刻舒舒服服咁想當年，咁一定美好㗎喎。
42歲，只係一個數字，比41多1，比35多7，人生依然咁過，夢想依然在心，生日依然只係365日入面其中一個平凡日子。唔係灰，只係路依然向前行，繼續向目標進發。
我有咩目標？我有咩夢想？可搵我傾下偈。你呢？又有咩夢想呀？可以同我傾下。
我一直以為今日係43歲生日，直至老朋友Wong Kam夜晚祝我42歲生日快樂時，停一停諗一諗，先發現自己賺咗。（其實無賺，係自己笨數錯啫。）